domingo, 6 de maio de 2018

OBRADOIRO DE CREACIÓN E INTERPRETACIÓN POÉTICA

A Concellaría de Normalización Lingüística vai levar a cabo un obradoiro gratuíto de Creación e Interpretación poética de 8 horas (impartido por Silvia Penas): Para maiores de 16 anos

O obradoiro (8 horas) terá lugar no Instituto Municipal de Educación-IME (camiño do Chouzo, 2):

Creación de textos poéticos (4 horas): repaso pola poesía oral galega, composición individual e colectiva de textos poéticos, procurar formas de creación, ideas e xogos para conseguir resultados na escritura automática e na improvisación oral de textos poéticos, etc. Lectura e interpretación (4 horas): aprender técnicas e exercicios básicos para un quecemento vocal, tratar de dominar a expresión facial e corporal,

Creación de textos poéticos-4 h: o luns, 28 e o martes, 29 de maio de 2018 de 18:00 a 20:00 (prégase puntualidade)
 Lectura e interpretación-4 h: o luns, 4 e o martes, 5 de xuño de 2018 de 18:00 a 20:00 (prégase puntualidade)

Para se inscribir deben enviar os seus datos (nome completo, idade, teléfono) ao correo electrónico actividades.snl@vigo.org (deben poñer no asunto: obradoiro creación e interpretación)

Máis información na web: snl.vigo.org Normalización Lingüística / Praza do Rei, 1 -36202 -Vigo- / Telf.: 986 81 02 81 Correo: ofi.normalizacion@vigo.org / http://snl.vigo.org / facebook: vigo en galego


OBRADOIRO DE SLAM

Aberto o prazo de inscrición
A Concellaría de Normalización Lingüística vai levar a cabo un obradoiro gratuíto de Slam, de 2’5 horas (impartido por Silvia Penas):
Obxectivos:
Saber e coñecer que é o Slam
Achegarnos á composición de textos propios: humorísticos, líricos, épicos, clásicos...
Ler e interpretar os textos poéticos
Educar a voz
Experimentar coa música
E... participaremos nun Slam
Para maiores de 16 anos.
O obradoiro terá lugar o:
martes, 22 de maio de 2018
no Instituto Municipal de Educación-IME (camiño do Chouzo, 2) de 18:00 a 20:30 (prégase puntualidade)
Para se inscribir deben enviar os seus datos (nome completo, idade e teléfono) ao correo electrónico actividades.snl@vigo.org (deben poñer no asunto: obradoiro slam)

Documentación

xoves, 3 de maio de 2018

QUEREMOS GALEGO: MANIFESTACIÓN POLA LINGUA, 17 DE MAIO


Queremos Galego convoca manifestación o 17 de maio baixo o lema En galego día a día

Reivindicará o esforzo de miles de persoas e colectivos para normalizar a lingua fronte ao 155 lingüístico da Xunta
Marcos Maceira “É o pobo galego quen mantén a lingua viva, en solitario, e quen exerce as obrigas da Xunta de Galiza e coa mobilización diaria consegue avances”
Santiago de Compostela, 23 de abril de 2018-. A plataforma cidadá Queremos Galego, composta por máis de 500 colectivos sociais de todo tipo, anunciou hoxe a convocatoria dunha multitudinaria manifestación para o 17 de maio baixo o lema “En galego día a día”. A manifestación percorrerá as rúas de Santiago de Compostela saíndo ás 12h da Alameda.
O anuncio foi realizado hoxe polo voceiro de Queremos Galego, Marcos Maceira, acompañado de membros da Xestora da plataforma cidadá, que sinalaron que ao longo dos próximos días e até a data da convocatoria desenvolveranse diversos actos nas comarcas galegas para informaren da convocatoria. Na web www.queremosgalego.gal indicaranse os horarios e prezos dos buses que se porán a disposición de todas as persoas que desexaren acudir a Compostela a impulsar a plena normalización da lingua galega.
En galego día a día
Queremos Galego reclamará este 17 de maio o día a día das persoas que fan que a lingua viva mais ás que se lles exixe un esforzo que non terían que facer se quixeren utilizar unha lingua plenamente normal.
Este día a día é que consegue manter viva unha lingua que non só non conta con amparo institucional senón que recibe desamparo e agresividade sistemática.
Co lema “En galego día a día” a plataforma cidadá pretende reivindicar o apoio social crecente á lingua galega que contrasta coa actitude da Xunta de Galiza que mantén un 155 lingüístico de facto. Segundo indicou o voceiro da Plataforma, Marcos Maceira, “en Galiza é o propio goberno galego, co presidente Feixó á cabeza, quen actúa como un vulgar delegado do goberno español, renegando das funcións que lle dá o estatuto de autonomía e da alta representación de Galiza que debería exercer”. Como consecuencia, sinalou, “o galego é o único idioma oficial do Estado que diminúe en falantes e carece de apoio do seu propio goberno”.

O 155 lingüístico de Feixó
“O  155  de Feixó anula as competencias e a capacidade da Xunta de actuar e lexislar a favor do galego, e polo tanto todos os artigos ao respecto do Estatuto, a LNL,  ou acordos parlamentares unánimes como o PXNLG. En Galiza nin se aplica nin se aproba ningunha lexislación a favor do galego mais si se aplican as máis de 500 disposicións legais que obrigan ao uso do español en diferentes ámbitos”.
“Existe unha sociedade que actúa día a día para repor e normalizar a lingua galega, a través de centos de colectivos e entidades e en ámbitos moi diversos” e que estarán representados como todos os anos no acto final da manifestación. Indicou tamén que “son moitas as persoas que sen falar galego aspiran a vencer as barreiras de todo tipo que lle impeden o mínimo de seguridade precisa para facelo e que demandan mudanzas que faciliten a súa instalación na lingua propia de Galiza”.
“É o pobo galego quen mantén a lingua viva, en solitario, e quen exerce as obrigas da Xunta de Galiza e coa mobilización diaria consegue avances. Grazas ao activismo social o galego conseguiu pequenas vitorias que dan mostra forza do pobo galego, mais tamén de todo o que falta por avanzar”.
Como exemplo citou as compañías de seguros que comezan a cumprir a lei e ofertar pólizas en galego; compañías de telefonía móbil que se obrigadas a rectificar anuncios de desaparición das opcións en galego; ou transnacionais que modificaron regulamentos internos que impedían o uso do galego, non porque actúe a administración senón por acción da sociedade. “Canto mellor estaría o galego se a administración actuase minimamente?”, perguntouse.
Propaganda fronte ao día día
Porén por parte do goberno galego a única actuación é a propaganda coa anuncio dun novo Plan, esta vez para a mocidade. Maceira instou á Secretaría Xeral de Política Lingüísitica e ao Presidente Feixó, a comezar por eliminar as prohibicións de uso do galego e a consideración como lingua extranxeira no ensino.



OS MAIOS. CELEBRACIÓN DA CHEGADA DA PRIMAVERA.

                            
 A Concellaría de Normalización Lingüística organiza esta actividade para celebrar a chegada da primavera
 Os Maios 2018

Festa cíclica presente na cultura rural europea dende tempos inmemoriais. Manifestación agraria a través da cal as xentes do campo celebraban o traballo da recollida dos froitos da primavera, representada no maio, adornando con elementos vexetais e froitos do campo.
A rapazada levará a cabo a danza das cintas, despois dun pequeno obradoiro de aprendizaxe.

Duración: 60 - 90 minutos Para todos os públicos

Día (abril- maio)

Hora

Lugar

30 (abril) luns

18:00
No Calvario (diante do mercado,Urzaiz, 183)
(colaboración de  ACECA-Asociación de              Comerciantes do Calvario- e do mercado do Calvario)
5 (maio) sábado

12:00
En Navia (entre os números 18 e 20 da rúa As Teixugueiras)
(colaboración da A.VV. Novo Vigo)

8 (maio) martes

18:00
En Coia, praza da Gurulla (entrando pola rúa Baiona, preto da gasolineira)
(colaboración coa Concellaría de Xuventude)
9 (maio) mércores

18:00
Na praza da Independencia
(colaboración coa Concellaría de Xuventude)
11 (maio) venres

18:00
En Bouzas (na alameda praza Suárez Llanos)
(colaboración da A.C. Vila de Bouzas)

12 (maio) sábado

11:30
En Teis (diante do mercado, rúa Toural de Abaixo cara á Sanjurjo Badía)
(colaboración do mercado de Teis)


martes, 6 de marzo de 2018

OBRADOIRO: CONTAMINACIÓN LUMINOSA"

O EDL da EOI de Vigo organiza un obradoiro sobre  "Contaminación luminosa" , o Xoves, 15 de Marzo ás 20 h.  Aula S1.

Presenta: Calidade do Ceo Nocturo
Ademáis haberá, a partir do 5 de marzo, unha exposición de Telescopios no vestíbulo da EOI . 

O obxectivo xeral do obradoiro é capacitar aos asistentes para criticar e valorar calquera tipo de iluminación artificial noctura dando as ferramentas necesarias para coñecer as consecuencias que os diferentes tipos de luz teñen na contorna na que se instalan. 
No obradoiro aprenderemos a diferenciar a mala e a boa iluminación, por que as temperaturas de cor son importantes, que cambios e consecuencias supuxo a tecnoloxía LED e a súa instalación desenfreada; falaremos de diferentes estudos científicos en materias diversas como economía, delincuencia, bioloxía, saúde, seguridade vial, medio ambiente, entre outros, e descubriremos como medir e interpretar resultados de contaminación luminosa para poder mergullar nesta problemática sen perdernos.
O desenvolvemento do obradoiro farase con exemplos reais, con xogos e favorecendo a participación dos asistentes.


Aforo limitado. 
Inscricións: 
  • na conserxería da EOI de Vigo,
  • no enderezo electrónico: eoi.vigo.edl@gmail.com ou 
  • no teléfono: 986260210

luns, 19 de febreiro de 2018

PASEO LITERARIO POLO VIGO DE ROSALÍA

En Santiago de Compostela, no Camiño Novo (hoxe Rosalía de Castro), nacía o 24 de febreiro de 1837 María Rosalía Rita, figura sobranceira das nosas letras, do noso renacer como pobo, feminista, intelectual e defensora da terra e lingua de noso.
O Concello de Vigo proclamou o 24 de febreiro como Día de Rosalía na nosa cidade (na que viviu e publicou "Cantares Gallegos").
A Concellaría de Normalización Lingüística vai levar a cabo un paseo literario Polo Vigo de Rosalía, guiado por Xurxo Martínez González:
Día: 24 de febreiro (sábado)
Punto de encontro/saída: oliveira do Paseo de Alfonso XII ás 11 horas
Non é necesaria inscrición previa.
Vigo da man de Rosalía de Castro polo Casco Vello de Vigo levaranos a coñecer a cidade no século XIX, os cambios sociais e políticos producidos tras a Reconquista.
Valoraremos o esforzo dunha elite intelectual viguesa que se ofreceu á cultura; descubriremos os lugares concretos das persoas que tiveron relación directa coa publicación de "Cantares gallegos".
Pasearemos polas prazas do Peñasco e da Constitución, polas rúas Chao, Real, Oliva... Deterémonos diante da imprenta de Compañel, da biblioteca pública, da imprenta do Faro de Vigo, da sede do goberno provincial...
Un paseo polo Vigo dos nosos devanceiros que nos axudará a completar o relato de cidade traballadora e industrial xa que Vigo tamén foi, e é, cidade cultural.
PERCORRIDO DO PASEO LITERARIO: POLO VIGO DE ROSALÍA 
Non cómpre inscrición previa Vigo da man de Rosalía de Castro polo Casco Vello de Vigo levaranos a coñecer a cidade no século XIX, os cambios sociais e políticos producidos tras a Reconquista; valorar o esforzo dunha elite intelectual viguesa que se ofreceu á cultura; descubrir os lugares concretos das persoas que tiveron relación directa coa publicación de Cantares gallegos; saber que na rúa Real Juan Compañel mantiña a imprenta do Rexurdimento... 
Un paseo polo Vigo dos nosos devanceiros que nos axudará a completar o relato de cidade traballadora e industrial xa que Vigo tamén foi, e é, cidade cultural. 
PUNTOS DE INTERESE: OLIVEIRA PRAZA DO PEÑASCO: falaremos sobre a importancia do movemento industrial; o desenvolvemento da burguesía, os cambios arquitectónicos que se ían producindo daquela... 
RÚA CHAO: darase a coñecer a relación da familia Chao con Vigo e con Rosalía de Castro. A importancia dos irmáns Chao, sobre maneira de Alejandro Chao... 
RÚA REAL: faremos dúas paradas; unha diante do que foi a sede da provincia de Vigo. O que nos levará a falar sobre o significado que tivo sermos provincia e a súa relación coa chegada a Vigo da imprenta. E xa daquela, da relevancia cultural do Vigo do momento. A seguinte será diante da imprenta de Compañel, onde falaremos da Rosalía dos Cantares. 
RÚA OLIVA: fronte onde estaba a imprenta de Faro de Vigo, local de Ángel Lema. 
BIBLIOTECA JUAN COMPAÑEL, sede do antigo Casino de Vigo. A importancia do seu presidente, mecenas de Rosalía de Castro, por ter posto os cartos para que houbese a imprenta de Compañel en Vigo. Relevancia do Casino. 
PRAZA DA CONSTITUCIÓN, onde estaba a botica de José María Chao. Sobre o movemento cultural, social e político que se producía na rebotica. 

CONCURSO: " O OLLO DE VIDRO"


Xa está aberto o prazo para participar no III concurso "O Ollo de Vidro" 
Se che gusta ler e queres recomendar un libro ou animar a lectura en xeral, participa neste concurso organizado pola Bibiloteca Municipal Xosé Neira Vilas e os equipos de Dinamización lingüística do IES Castelao e da EOI de Vigo. 
 Colaboran no proxecto a Asociación de Veciños do Calvario e o Mercado do Calvario. 

Como novidade este ano contamos coa participación no Festival de Curtas de Cans.

Anímate!!! Podes gañar un destes fantásticos premios:

  • A. Premio do xurado.
    Dotación económica de 400€, escultura conmemorativa e un lote de libros.
  • B. Premio do público.
    Dotación económica de 250€ e un lote de libros.
  • C. Premio Festival de Cans.
    Hotel para dúas persoas (noite de venres 25 e sábado 26 de maio), dúas entradas para acceder ás curtametraxes a concurso do Festival de Cans, placa conmemorativa e un lote de libros.
Para máis información: 



martes, 6 de febreiro de 2018

CURSO DE AUGA DOCE


O curso dos ríos, vertebradores desde sempre do noso territorio e da nosa relación co espazo, empregados como fonte de recurso e incorporados ao noso patrimonio inmaterial na elaboración de lendas, mitos, léxico ou fraseoloxía, atesouran unha grande riqueza lingüística e cultural que é de todas e de todos, de aí a importancia de dala a coñecer e facilitar o acceso a ela.
Neste curso profundaremos no coñecemento dalgúns aspectos da lingua galega seguíndomos os cursos dos nosos ríos e regatos, e de todo canto medrou e medra ao longo das súas bacias e máis da historia que os acompaña, ese outro río.
O curso remata cunha saída a uns muíños vigueses e a un bosque de ribeira.
O curso é de balde e está organizado polo Servizo de Normalización Lingüística.

DATAS: 20, 22, 27 de febreiro e 1, 6, 8, 13, 15, 20, 22 de marzo de 2018

HORARIO: de 18:30 a 20:30 LUGAR: Oficina Municipal de Distrito de Bouzas-Casa Patín (Eduardo Cabello, 36)
DURACIÓN DO CURSO: 20 horas ( + saída de 2 horas a muíños)
Para inscribirse deben enviar os seus datos (nome completo, teléfono e DNI) ao correo electrónico actividades.snl@vigo.org {poñer no asunto: curso de auga doce} A Oficina Municipal de Distrito de Bouzas é un espazo cedido gratuitamente polo Concello de Vigo coa colaboración da Concellaría de Participación Cidadá Normalización Lingüística / Praza do Rei, 1 -36202 -Vigo- / Telf.: 986 81 02 81

LUDOTECA LINGÜÍSTICA: FORZA 3


A Concellería de NL, a través do Servizo de Normalización Lingüística do Concello de Vigo, oferta unha actividade dinamizadora do galego dirixida á poboación escolar.

- Ludoteca lingüística: Forza 3

A Ludoteca Lingüística é un proxecto de dinamización lingüística que consiste na recuperación de xogos populares, a disposición de xogos novos e diferentes, e xogos lingüísticos que procuran fomentar o uso do galego dun xeito eminentemente lúdico e en relación co currículum de Educación Física e Lingua Galega. Con formato de gran feirón, os rapaces/zas terán que ir superando as distintas probas que se lles propoñan de maneira rotatoria e cooperativa ao mesmo tempo.

Achegaremos, xunto coa actividade, "Bota e rebota e cae na túa boca". É un manual dirixido ao profesorado de Educación Física co obxectivo de incorporaren actividades de dinamización lingüística e do fomento do galego nas súas programacións didácticas.
"Bota e rebota..." achega propostas eminentemente prácticas relacionadas cos bloques de contidos das áreas de E.F. e Lingua e Literatura Galegas.


Duración: 1 hora e 30 minutos

Dirixido a: alumnado de primaria (5.º)


Lugar de realización da actividade: no propio centro de ensino (obrigatoriamente nas instalacións deportivas do centro) para calquera dúbida sobre este tema poden consultar con Nerea Couselo 649 70 21 94)


Para solicitar a actividade é necesario enviar cuberta, a solicitude que se achega, o día 5 de marzo ao correo electrónico actividades.snl@vigo.org
As solicitudes, enviadas por correo electrónico, atenderanse por estrita orde de chegada o día 5 de marzo a partir das 9:30 e até as 14:00 (deben poñer no asunto: ludoteca lingüística)

Os obradoiros concederánselles, en primeiro lugar, aos centros de ensino nos que a actividade non foi impartida o pasado curso escolar.

Normalización Lingüística / Praza do Rei, 1 -36202 -Vigo- / Telf.: 986 81 02 81
Solicitude de participación na actividade:
Ludoteca lingüística para primaria (5.º)

Cubrirase unha ficha por cada un dos grupos que desexen participar na actividade. Débese remitir esta solicitude ao correo electrónico: actividades.snl@vigo.org o día 5 de marzo a partir das 9:30 e até as 14:00 (deben poñer no asunto: ludoteca lingüística)

Importante:         non se aceptarán as solicitudes que non estean correctamente cubertas (obrigatorio cubrir todos os campos).

DATOS DO CENTRO DE ENSINO:

Nome do centro: _________________________________________________________

Nome e apelidos da persoa de contacto: ______________________________________
-Durante a actividade é obrigatorio que estea presente o/a titor/a do grupo que desenvolve a actividade-

Teléfono de contacto: __________________

Número máximo de participantes nun grupo: 50


Indicar a preferencia (de 1 a 10) para a participación na actividade.


Non marquen os días nos que non poidan recibir a actividade, porque de se lle outorgar e non poder recibila, non se facilitará outra data.


_____ 15 marzo (xoves), ás 10:00                      _____ 20 marzo (martes), ás 10:00
_____ 15 marzo (xoves), ás 12:30                      _____ 20 marzo (martes), ás 12:30
_____ 16 marzo (venres), ás 10:00                     _____ 21 marzo (mércores), ás 10:00
_____ 16 marzo (venres), ás 12:30                     _____ 21 marzo (mércores), ás 12:30
_____ 19 marzo (luns), ás 10:00
_____ 19 marzo (luns), ás 12:30


Importante:        a Concellería de Normalización Lingüística confirmará -por correo electrónico- a cada centro o/s grupo/s admitido/s, con indicación do día e a hora adxudicado/s.