mércores, 8 de outubro de 2014

NOVO NÚMERO DE OLLOS DE AULA

Prezados/as amigos/as,
Chegou un novo curso e con el o outono, e co outono un novo número de Ollos de aula, a revista que edita a CGENDL para as familias do alumnado:
Nesta primeira entrega, Mª Montserrat Carrasco Rodríguez, profesora de CC.EE. da UDC, aborda a creación dos hábitos de traballo nos nenos/as, mentres que o inspector Fernando Carrasco Mera analiza os cambios inminentes que introduce a LOMCE. Pola súa banda, a psicopedagoga Lines Salgado presenta a aprendizaxe por proxectos, unha metodoloxía moi interesante para introducir nas aulas. E, por suposto, non faltan á cita as atractivas propostas lectoras que nos fai Gracia Santórum nas súas "Cadencias”. Agardamos que estes contidos sexan do voso interese e das familias, de aí que coma sempre vos animemos a distribuíla na vosa comunidade educativa e no contorno dos vosos centros.
Así mesmo, informámosvos que o Consello Directivo da CGENDL tomou a decisión de esixir a dimisión de Valentín García, Secretario Xeral de Política Lingüística, polo incumprimento reiterado das demandas dos Equipos e pola nefasta xestión levada a cabo no seu departamento en todo este tempo de retrocesos para a lingua galega no ensino e na sociedade. Por último, lamentamos a exclusión da Coordinadora da rolda de reunións que o Comité de Expertos da UE que avalía o cumprimento da Carta Europea de Linguas Rexionais e Minorizadas mantivo esta semana en Santiago e achega unha síntese das consecuencias para o galego nas aulas do Decreto 79/2010 ou do Plurilingüismo. Nestas cuestións, como outras que atinxen ao noso traballo nos centros, agardamos as vosas suxestións, propostas, denuncias, etc.
Saúdos normalizadores

CGENDL

Ningún comentario:

Publicar un comentario