sábado, 27 de abril de 2013

I XORNADAS DE FORMACIÓN E INTERCAMBIO DE EXPERIENCIAS DE DINAMIZACIÓN LINGÜÍSTICA NO ENSINO EN VIGO

Os pasados 24 e 25 de abril, no IME de Vigo, tivo lugar o primeiro Encontro de formación e intercambio de experiencias de Dinamización lingüística a cargo de docentes de distintos centros de Vigo e bisbarra e de tódolos niveis educativos que participaron nestas xornadas. O traballo e as exposicións resultaron moi gratificantes e proveitosas para todas e todos, así como as intervencións de dinamizadores da lingua doutros ámbitos: Francisco Castro, escritor e editor,  Luís Caruncho, regueifeiro, e Brais Fernández, dinamizador pertencente ao grupo Xandobela, xurdiron verdadeiras experiencias dinamizadoras das que extraer novas ideas para seguir traballando, unhas máis elaboradas e outras máis sinxelas, pero coa mesma impronta nos asistentes. Xurdiron novas ideas, risos, entusiasmos, debates, diálogos, xogos, aprendizaxes, colaboracións e a concepción clara de que non estamos tan sós e soas no labor de fomentar o uso da lingua de noso entre o alumnado, que as pequenas experiencias contan, que todo é importante e valioso, e que o labor do equipo de dinamización dos centros é un labor que deixa pegadas paseniño mais certeiras, puxéronse en valor traballos que moitos de nós non considerabamos de grande importancia ata que compartidos cos demais caemos na conta de que si tiñan a súa relevancia por ter conquerido a súa finalidade, que era o estímulo cara o respecto e uso da nosa lingua,  e valoramos a tarefa das compañeiras e compañeiros na súa procura de novos resortes para dinamizar.
@s organizador@s das Xornadas ( CDEDLG de Vigo e bisbarra, SNL do Concello de Vigo, e CIG ensino) estamos complacid@s e agradecid@s ás compañeiras e compañeiros que participaron como poñentes e nos permitiron partillar e aprender do seu traballo, e a todas aquelas persoas que foron coma asistentes e acabaron coma participantes, eramos pouc@s , mais iso permitiunos a interacción e axudou a ese ambiente familiar que nos deixou a tod@s ese bon sabor de boca co que onte rematamos.
Parabéns a tod@s polo voso traballo e participación!




domingo, 21 de abril de 2013

OBRADOIRO DE ESCRITA CREATIVA

A Concellaría de Normalización Lingüística
organiza este
Obradoiro de escrita creativa
O mércores 24 e o luns 29 de abril na Biblioteca Pública Central (Joaquín Yáñez, 6) de 17:00 a 19:00 h
Impartido por: Francisco Castro (escritor)
Número de prazas: 15
Para inscribirse deben chamar ao teléfono: 986 81 02 81 de 9:00 a 13:00 h
Dirixido a persoas adultas ás que lles gusta escribir.
Neste obradoiro, gratuíto, concebido dende unha perspectiva lúdica e moi participativa, quen acuda terá a oportunidade de plasmar sobre o papel a ampla experiencia que dan os anos e a memoria, e de converter as súas vidas en literatura.
Todas as persoas que participen terán a ocasión de, dende o primeiro momento, escribir poemas, relatos, contos... sempre en actividades moi sorprendentes

sábado, 20 de abril de 2013

PROGRAMA: XORNADAS DE FORMACIÓN E INTERCAMBIO DE EXPERIENCIAS DE DINAMIZACIÓN LINGÜÍSTICA NO ENSINO.

Xornadas de Formación e Intercambio de Experiencias de Dinamización Lingüística no
Ensino.
Organizan: CIG-Ensino
Concellaría de Normalización Lingüística do Concello de Vigo
Coordinadora de ENDLs de Vigo e bisbarra
24 e 25 abril, Instituto Municipal de Educación, Camiño do Chouzo, Vigo
Solicitouse homologación á Consellaría de Educación*

mérc. 24 abril
16.30 Recepción de participantes pola organización.
17.00 Dous Proxectos Lingüísticos de Centro: os IES de Teis e de Chapela.
18.00 Proxecto Educativo “Tesouros Vivos”
18.30 Luís Caruncho: Dez anos de regueifas nos centros de ensino de Vigo.
19.00 Descanso
19.20 Francisco Castro: Eu escribo, ti escribes, el/ela escriben.
20.00 A largada da pomba (CEIP Igrexa-Candeán)
20.30

xoves 25 abril
16.30 Achégate a Bembrive. Abre os teus sentidos. (CEIP Chans-Bembrive)
17.00 Toponimia:
Unha experiencia no CEIP Coutada-Beade.
Códigos QR e toponimia (IES Alexandre Bóveda)
17.40 A experiencia audiovisual: a TV do IES de Beade
18.15 Descanso
18.30 Rosalía musicada (CEIP Ría de Vigo)
19.00 Cantiga amiga (IES de Teis e Colexio Nosa Sra. da Esperanza)
19.30 Brais Fernández (Xandobela): Técnicas de dinamización.
20.30
(*) De ser concedida, as persoas asistentes recibirán unha certificación de 8 horas de formación.
As persoas que ao mesmo tempo presenten experiencias, poden solicitarnos que se especifique o
tempo que actuaron como relatoras
(Orde 01/03/2007; art.19.5: “As actividades de menos de oito horas non
serán computables nin poderán acumularse, agás no caso das persoas relatoras” e artigo 21.5: “No caso dunha persoa
que sexa asistente a unha actividade e, ao mesmo tempo, actuase como relatora, sempre que non supere o tempo que
actuou o 15% da duración total da actividade, poderáselle emitir un certificado no cal se especificarán as horas totais da
actividade a que asistiu e as horas que actuou como relatora.”)
É preciso ter unha conta de correo electrónico @edu.xunta.es e asinadas as follas de asistencia

ROBERTO VIDAL BOLAÑO

Xa tedes á vosa disposición na web www.seminariogalan.org  numerosa información sobre o autor homenaxeado no Día das Letras Galegas, 2013,  Roberto Vidal Bolaño (biografía, fotos, obra...) así como diferente material didáctico, en PDF e en rede para os tres ciclos de educación primaria e educación infantil.
ENLACE DIRECTO http://www.seminariogalan.org/ E NO TÍTULO DO POST.

«ROBERTO VIDAL BOLAÑO E OS OFICIOS DO TEATRO» DE ROBERTO PASCUAL

Roberto PascualXERAIS LIBROX(1379503) 136páxinas
ISBN: 978-84-9914-495-5
P.V.P: 10,00 €
NOVIDADES ABRIL 2013
«ROBERTO VIDAL BOLAÑO E OS OFICIOS DO TEATRO» DE ROBERTO PASCUAL LETRAS GALEGAS 2013 ESTE LIBRO É ÚTIL PARA UN PÚBLICO DIVERSO, INTERESADO NA FIGURA HOMENAXEADA NAS LETRAS GALEGAS
2013.
Roberto Vidal Bolaño (Santiago de Compostela, 1950 – 2002), autor, director, escenógrafo, actor e mesmo crítico de teatro é, sen dúbida, a figura máis destacada da historia da dramaturxia galega, tanto pola cantidade como pola calidade e innovación das súas obras, así como pola súa participación nos múltiples oficios que compoñen o urdido teatral. Autor monolingüe en galego e referente ineludible para os dramaturgos da actualidade, Vidal Bolaño viu con claridade xa dende os seus comezos na década de 1970, no marco da Mostra de Teatro en Galego Abrente, de Ribadavia, a necesidade de consolidar e profesionalizar o teatro galego.
Roberto Vidal Bolaño e os oficios do teatro
pretende divulgar, dun xeito amplo e comprensible para todas as idades e intereses, as profesións vinculadas coa produción teatral, que tanto contribuíu a dignificar e a modernizar Roberto Vidal Bolaño. Debuxou coa súa voz, falou con máscaras, coa forza expresiva do corpo, dos ritmos populares, das técnicas audiovisuais, deseñou espazos onde concitou heroes e mitos do pasado ou desagraviados e silenciados do presente. Inconformista, polémico, ocupado en oficiar en cada función a máis fresca e vibrante liberdade da acción dramática. Esta obra amosa o que hai detrás dos fíos que crean a maxia inesgotable, eternamente transformadora, da arte do teatro.
Roberto Pascual
(O Carballiño, 1981) é profesor e xefe de estudos da Escola Superior de Arte Dramática de Galicia e director da Mostra Internacional de Teatro de Ribadavia. Licenciado en Filoloxía Galega e posgraduado en Arte Dramática, formouse tamén na Aula de Teatro da Universidade de Santiago de Compostela. Forma parte dos consellos de redacción de Madrygal e Revista Galega de Teatro e dirixe a colección Abrente de Teatro. Na súa produción editorial destacan Palabra e acción. A obra de Manuel Lourenzo no sistema teatral galego (2006), 25 anos. Mostra Internacional de Teatro de Ribadavia (2009) ou Alén. Xaime Quintanilla (2010).

«O SEÑOR CORPO QUERE XOGAR» DE ALICIA BORRÁS SANJURJO

Alicia Borrás SanjurjoIlustracións de Rodrigo ChaoXERAIS MERLIÑO(1343225)
40páxinas
ISBN: 978-84-9914-483-2
P.V.P: 11,00 €
NOVIDADES MARZO 2013
«O SEÑOR CORPO QUERE XOGAR» DE ALICIA BORRÁS SANJURJO ILUSTRADO POR RODRIGO CHAO O SEÑOR CORPO QUERE XOGAR, QUERE MOVERSE, QUERE BRINCAR.
O Señor Corpo quere xogar, quere moverse, quere brincar. Dona Cabeza vaille axudar, os ollos terán que mirar, a boca falar, as orellas escoitar, coas pernas camiñar e cos pés andar.
E que fará o señor Corpo cos brazos, coas mans, co cuíño…?
Alicia Borrás
naceu en Vigo onde traballa como profesora de teatro, actriz de dobraxe e escritora. Ten publicado o libro Nata y chocolate (2010). Coa su a obra Versos graciosos, sabrosos y jugosos quedou finalista do Premio Lazarillo de Creacio n literaria. O señor Corpo quere xogar (Xerais, 2013) e o seu primeiro libro publicado en Xerais.
Rodrígo Chao
(Boiro, 1976), cursou estudos de ilustración na cidade de Ourense, ten experiencia no campo da animación e publicou Adiós ríos; Adiós fontes e O conto dos silencios. En Xerais ten publicados Natasha e Dimitri (Xerais 2006), A carreira de sacos (Xerais 2007), Pingueiras e tarteiras (Xerais, 2009), Xoa (Xerais, 2010) e O Señor Corpo quere xogar (Xerais, 2013

«RECKLESS. VIDA NAS SOMBRAS» DE CORNELIA FUNKE

Cornelia FunkeTradución de Mª Xesús Bello XERAIS MILMANDA(1334511)
448páxinas
ISBN: 978-84-9914-499-3
P.V.P: 22,70 €
NOVIDADES MARZO 2013
«RECKLESS. VIDA NAS SOMBRAS» DE CORNELIA FUNKE SEGUNDA PARTE DE RECKLESS LOGO DE RECKLESS. CARNE DE PEDRA. A TENEBROSA HISTORIA CONTINÚA...
A marca da trilla sobre o corazón de Jacob escurece un pouco máis cada día: símbolo da condena a morte que lle infrinxira a Fada Escura por ousar pronunciar o seu nome. Murmurárallo a irmá da fada entre dous bicos. Ningún home foi condenado a morte de xeito máis tenro. Amor traizoeiro... O vermello sanguento que rodea a pegada da trilla lembra o crime polo que está a morrer. A trilla deberá trabarlle seis veces no peito antes de regresar onda a súa dona e deixar a Jacob só ante a morte. Dá comezo así a busca febril polo antídoto que o pode salvar. Unha carreira contra o tempo e contra o goyl Nerron. O goyl arela converterse no mellor buscador de tesouros do Mundo do Espello. Jacob, pola contra, só busca vencer a morte. A tenebrosa historia continúa...
Cornelia Funke
(Dorsten / Westfalia, Alemaña, 1958) estudou Pedagoxía e Ilustración en Hamburgo. Axiña comezou a traballar como ilustradora de contos infantís para despois centrarse na escrita dirixida a público xuvenil. É autora de máis de cincuenta libros e guións e actualmente vive en Los Ángeles (EE.UU.). Cornelia Funke é unha das autoras máis queridas e lidas no mundo. Coñecida como a "Rowling alemá" e elixida pola revista Times como unha das cen persoas máis influentes do planeta, xa vendeu máis de 14 millóns de exemplares das súas obras, entre as que destaca a triloxía Tintenwelt (Mundo de Tinta). En Xerais ten publicados os títulos: Reckless. Carne de pedra (Xerais, 2010), Premio Fervenzas Literarias 2010 ao Mellor libro Xuvenil-Infantil traducido ao galego; Reckless. Vida nas sombras (Xerais, 2013); O espírito do cabaleiro (Xerais, 2011) e o álbum ilustrado A princesa Sabela (Xerais, 2011). Máis información en www.corneliafunke.es.

«O APRENDIZ DE HOME DO SACO» DE ANTONIO REIGOSA

Antonio ReigosaIlustracións de Marta Álvarez MiguénsXERAIS MERLIÑO(1343226)
40páxinas
ISBN: 978-84-9914-484-9
P.V.P: 11,00 €
NOVIDADES MARZO 2013

«O
APRENDIZ DE HOME DO SACO» DE ANTONIO REIGOSA
ILUSTRADO POR MÁRTA ÁLVAREZ MIGUÉNS COMO SE PODE APRENDER EN POUCO TEMPO OS TRUCOS PARA SER UN BO HOME DO SACO?
Había unha vez un home moi vello que estaba amolado porque o seu único fillo non quería herdar o seu oficio. Todos os días o pai, chovese ou non, tiña que ir traballar, mentres o fillo quedaba estomballado na casa agardando a hora do xantar. Pero un día todo cambiou: o pai enfermou e o rapaz tivo que aprender en pouco tempo os trucos para ser un bo home do saco.

Antonio Reigosa
(Zoñán, Mondoñedo 1958) traballa como guía no Museo Provincial de Lugo. Cofundador de Chaira, grupo de Investigación Etnográfica, ten participado en proxectos de investigación sobre literatura oral. Tamén é coautor, xunto con Xosé Miranda e Xoán Ramiro Cuba, do Dicionario dos Seres Míticos Galegos (Xerais 1998) e dos vinte volumes dos contos da colección Cabalo Buligán (Xerais 1998-2003) recollidos da tradición oral. Así mesmo é coautor dos volumes Contos colorados. Narracións eróticas da tradición oral galega (Xerais 2001), Pequena mitoloxía de Galicia (Xerais 2001), Cando os animais falaban (Xerais 2002), Arrepíos e outros medos (Xerais 2004) e Antoloxía do conto galego de tradición oral (2002). Xunto coa ilustradora Noemí López, publicou os álbums Guía ilustrada da Galicia invisible (2010) e Trece noites, trece lúas. Libro das marabillas do Nadal (2011). Como autor de literatura infantil publicou: Memorias dun raposo (Xerais 1998), novela, Premio Merlín; Resalgario (Xerais 2001), novela, Premio Raíña Lupa de literatura infantil 2000; "Aire de sumidoiro", conto incluído en Contos para levar no peto (Xerais 2001); O galo avisado e o raposo trampulleiro (Xerais 2003); Bacoriño (Xerais 2004) e O aprendiz de home do saco (Xerais 2013).

Marta Álvarez
(Vilagarcía de Arousa, 1976) ten ilustrados numerosos libros infantís, entre eles, Sopa de xarope (Xerais, 2010) e O aprindiz de home do saco (Xerais, 2013). É tamén autora dos textos e das ilustracións de Como está o galiñeiro (Xerais 2002) e A aspironeta (Xerais 2005

«O MERLO DE FERRO» DE ANTÓN CORTIZAS

Antón CortizasIlustracións de Xosé CobasXERAIS MERLIN de 9 anos en diante(1343227)
56páxinas
ISBN: 978-84-9914-488-7
P.V.P: 11,00 €
NOVIDADES MARZO 2013

«O M
ERLO DE FERRO» DE ANTÓN CORTIZAS
ILUSTRADO POR XOSÉ COBAS
O
MERLO DE FERRO NON É UN MERLO CALQUERA, É CAPAZ DE CANTAR E VOAR POR ENRIBA  DOS VENTOS.

A forxa de Manuel ten unha xanela de vidros cadradiños e pequenos. Pegado a ela hai un banco ateigado de ferramentas: mazos, martelos, tenaces, alicates, parafusos, cravos… Ao outro lado da xanela o que hai son campos verdes e árbores verdes e montañas verdes. Os vidros da xanela semellan caramelos de menta. Un día, mentres o ferreiro vía a través dos vidros, na xanela póusase un paxariño. —É un merlo! –exclamou moi contento. A partir daquela Manuel decidiu facer un merlo de ferro, pero non un calquera, senón un que fose capaz de cantar e de voar por enriba dos ventos.

Antón Cortizas Amado (Ferrol, 1954),
mestre de profesión, é un dos autores máis premiados e traducidos da literatura infantil e xuvenil galega. Deuse a coñecer co relato "A media muller" co que obtivo o Premio Curuxa de Humor de Fene en 1986. Dende entón publicou, entre outras, as seguintes obras: O merlo de ferro (1995) (Xerais 2013); Leonel (Xerais 1996); A merla de trapo (Xerais 2001), Premio Merlín 2001; Onde o sol non adormece (Xerais 2003) e Vaia tropa! (Xerais 2011). Como investigador publicou Chirlosmirlos. Enciclopedia dos xogos populares (Xerais 2001), Ao pé da Laxa da Moa. Literatura de tradición oral de Carnota (Xerais 2010) e Tastarabás. Enciclopedia de brinquedos tradicionais (Xerais, 2013).

Xosé Cobas Gómez
(Logrosa-Negreira, A Coruña, 1953) está vencellado profesionalmente ao mundo da pintura e o deseño gráfico. A comezos dos anos 80 toma contacto co mundo da ilustración, sobre todo na prensa e máis nas revistas, iniciándose na ilustración de literatura infantil e xuvenil, sen abandonar os rexistros pictóricos. Dende aquela publicou numerosos libros, gañou varios premios e participou en diversas exposicións en España e no estranxeiro. Entre os seus libros destaca, O libro das viaxes imaxinarias (Xerais 2008) Premio Isaac Díaz Pardo ao Libro Ilustrado do Ano 2008, Premio Asociación de Escritores en Lingua Galega (Infantil - Xuvenil), 2008 e Premio Fervenzas Literarias ao Mellor Libro Xuvenil, 2008. Máis información en: http://www.xosecobas.es

«O GATO FANTASMA» DE XELÍS DE TORO

Xelís de Toro
Ilustracións de Almudena AparicioXERAIS MERLIN de 9 anos en diante(1343228)
72páxinas
ISBN: 978-84-9914-489-4
P.V.P: 11,00 €
NOVIDADES MARZO 2013
«O GATO FANTASMA» DE XELÍS DE TORO ILUSTRADO POR ALMUDENA APARICIO
CANDO
ROLO COÑECEO A RABUDO, O GATO FANTASMA, TODO COMEZOU A CAMBIAR.
Rolo e Pestiña son moi amigos, que non noivos, e sempre ao saír da escola van xuntos para a casa. Pero aquel día en que todo comezou, Pestiña non daba chegado á praza do camelio, onde sempre quedaban. Mentres Rolo agardaba comezou a chover; estábase poñendo coma un pito. Logo dun anaco viu aberto un portal dunha casa e foi correndo a refuxiarse. Dende alí vería ben a Pestiña. Rolo nunca reparara nese portal, que máis ben parecía unha cova. E Pestiña sen aparecer! De repente Rolo escoitou un ruído ás súas costas que o asustou: era un gato cun ratiño na boca. Sería o gato do que todos falaban no recreo, o tal Rabudo, o que lle podía a un pastor alemán? A partir dese encontro entre Rolo e o gato fantasma todo comezou a cambiar…
Xelís de Toro
(Santiago de Compostela, 1962 ). Publicou os seguintes libros de narrativa: Seis cordas e un corazón, 1989 (co seudónimo de Roque Morteiro, Xerais 1990), novela, Premio Compostela Cultural; Non hai misericordia (1990, Xerais 2003), relatos, Premio Narrativa Cidade de Lugo; Terminal (1994); Os saltimbanquis no paraíso (1999), novela Premio San Clemente en 2000 ; The Corunna boats (Xerais 2004), novela ; Riofero (Xerais 2009), novela e O gato fantasma (Xerais 2013), novela infantil. Xelis de Toro mantén na rede o espazo http://laboratoro.net/
Almudena Aparicio
(1978). Dende moi nova mostrou interese polo debuxo e a súa familia puxo todas as ferramentas necesarias para desenvolver as súas capacidades creativas, malia que nunca imaxinaron que nun futuro esta sería, ademais da súa paixón, a súa saída profesional. Moi pouco tempo despois de rematar os seus estudos na Facultade de Belas Artes de Pontevedra, comezou a colaborar coa editoral Anaya na ilustración de libros de texto. Dende entón traballou en múltiples publicacións infantís, libros de texto, aplicacións interactivas e traballos con fins publicitarios e divulgativos. O gato fantasma é a súa primeira colaboración con Xerais. Mantén a súa paxina www.almudenaaparicio.com

«OS SABUXOS ENTRAN NA CASA DO PÉ ESQUERDO» DE JAUREGUIZAR

Jaureguizar
Ilustrado por Matalobos XERAIS SOPA DE LIBROS 10 anos en diante(1384047)
152páxinas
ISBN: 978-84-9914-491-7
P.V.P: 9,30 €
NOVIDADES ABRIL 2013
«OS SABUXOS ENTRAN NA CASA DO PÉ ESQUERDO» DE JAUREGUIZAR ILUSTRADO POR MATALOBOS AS AVENTURAS DUNHA PANDA MOI ESPECIAL. Unha noite desapareceron todos os zapatos do pé esquerdo; no barrio todo o mundo sospeita do Mangallón, un vello rabudo que vende calzado. Tan só un grupo de rapaces que lidera Nica cre na súa inocencia. Son Os Sabuxos. Eles ocuparanse de descubrir a verdade e de que non derruben a casa do Mangallón para ampliar un campo de golf. Por outra parte, Nica intentará que o guaaapííísimo Sam lle preste un chisco de atención... Jaureguizar (Bilbo, 1965). Xornalista. Traballa en El Progreso de Lugo. Como narrador ten publicados os seguintes libros: Fridon spik (Xerais 1995, 2003), narracións breves; Comendo espaguetis diante da televisión (Xerais 1998), novela; As horas sucias (Xerais 2001), novela; Breve crónica universal da clase obreira (2001), novela, Premio Lueiro Rey 2001, Casa Skylab (Premio Xerais 2003), novela, Cabaret Voltaire (Premio Manuel García Barros 2005), novela e O Globo de Shakespeare (Premio Terra de Melide, Xerais 2008). É autor, ademais, das novelas xuvenís Todo a cen (1995), A rutina corsaria (Xerais 1998), Salitre (Xerais 1999), ¡Balea morta ou lancha a pique! (Xerais 2002), A cova das vacas mortas (Xerais 2006), premio Fundación Caixa Galicia de Literatura xuvenil, Plastilina nos pulmóns (2007) e O contador de estrelas (2009). É autor da serie de novelas protagonizada polo xove detective Tintimán: Corazón de chocolate. Un misterio para Tintimán en Compostela (Xerais 2010), A coroa de napoleón. Un misterio para Tintimán na Coruña e Amor de Serea. Un misterio para Tintimán en Vigo (Xerais 2012). Mantén aberto o blog Cabaret Voltaire

DESDE UNHA ESTRELA DISTANTE, AGUSTÍN FDEZ. PAZ

Agustín Fernández Paz
Ilustrado por David Pintor XERAIS SOPA DE LIBROS 8 anos en diante(1384048)
168páxinas
ISBN: 978-84-9914-492-4
P.V.P: 10,00 €
NOVIDADES ABRIL 2013

«D
ESDE UNHA ESTRELA DISTANTE» DE AGUSTÍN FERNÁNDEZ PAZ
ILUSTRADO POR DAVID PINTOR PODERÁN CHEGAR A ENTENDERSE DOUS SERES TAN DIFERENTES?
Daniela está pasando uns días na casa da súa avoa antes de mudarse coa súa familia a unha nova cidade. Unha tarde sobe ao faiado a explorar e alí leva o susto da súa vida. Ao abrir un baúl, aparécelle un rato decidido a falar con ela e que, en realidade, é un extraterrestre! Poderán chegar a entenderse dous seres tan diferentes?
Agustín Fernández Paz (Vilalba, 1947) é unha das figuras máis destacadas da literatura galega contemporánea. Publicou entre outras obras: Contos por palabras (1991), Premio Lazarillo 1990, Lista de Honra do IBBY 1992; Rapazas (1993); Trece anos de Branca (1994), Premio Edebé de literatura xuvenil 1994; Cartas de inverno (1995), Premio Rañolas ao mellor libro xuvenil; Amor dos quince anos, Marilyn (1995), relatos; O centro do labirinto (1997), novela; Aire negro (2000), Lista de Honra do IBBY 2002, Lista The White Ravens 2004 e Premio Protagonista Jove 2001; Noite de voraces sombras (2002); Tres pasos polo misterio (2004); Corredores de sombra (2006), Premio Frei Martiño Sarmiento; O único que queda é o amor (2007), Premio Nacional de literatura infantil e xuvenil, Premio Neira Vilas da AGE, Premio da AELG, Premio Frei Martiño Sarmiento; Lúa do Senegal (2009), novela, Premio da AELG; Non hai noite tan longa (2011) e Fantasmas de luz (2011). Reuníu textos memorialísticos no libro O rastro que deixamos (2012). A maior parte da súa obra está traducida a todas as linguas ibéricas, coreano, árabe e francés. Entre outros recoñecementos á súa traxectoria, recibiu o Premio Irmandade do Libro (2003); o Premio Xosé María Álvarez Blázquez (2008), a Letra E (2009) da AELG; e en 2011 recibiu o Premio Iberoamericano SM de Literatura Infantil e Xuvenil. Foi o candidato da OEPLI ao Astrid Lindgren Memorial Award; en 2011 foi escollido pola OEPLI como o candidato español ao Premio Andersen 2012

OBRADOIRO DE COMUNICACIÓN ORAL

A Concellaría de Normalización Lingüística
organiza este obradoiro gratuíto
Comunicación oral

O 29 e 30 de abril no salón de actos do Instituto Municipal de
Educación-IME (camiño do Chouzo, número 2) de 17:00 a 19:30 h
Impartido por: Uxía Blanco
Para inscribirse deben chamar ao teléfono: 986 81 02 81 de 9:00 a 14:00 h
Dirixido a persoas adultas que queiran seducir coa voz
Obradoiro no que nos achegaremos a como comunicarnos en público: vencer o medo ao micrófono, como modular a voz, ordenar o discurso...
A linguaxe non verbal, a presenza, a brevidade...
Comunicación dende a lingua de noso, lingua que ten un valor engadido xa que nos permite comunicarnos con 240 millóns de persoas pertencentes a lusofonía.
Asemade, vencemos prexuízos como "no hablo en gallego, porque no lo hablo bien" ou "en galego só nos entenden a xente de aquí"

VIGO, CAPITAL DO REXURDIMENTO

A Concellería de NL, a través do Servizo de Normalización Lingüística do Concello de Vigo, oferta unha actividade dinamizadora do galego dirixida á poboación escolar.
- Charla: Vigo, capital do Rexurdimento

A actividade pretende amosar a relación da cidade de Vigo e das súas elites intelectuais co Rexurdimento galego. En concreto, e aproveitando o 150 aniversario da publicación de
Cantares gallegos, empregaremos a figura de Rosalía como un fío condutor do noso relato explicativo.
Entre outros aspectos, pretendemos que o alumnado recoñeza e comprenda o rol que mantivo Vigo no proceso de conformación das liñas culturais e ideolóxicas do Rexurdimento, que sexan capaces de valorar nun tempo histórico concreto (metade do século XIX) as inquedanzas, riscos e éxitos daquela xeración. Trátase de valorar a importancia do esforzo colectivo e a solidariedade como unha necesidade para acadar
grandes metas.
Na actividade empregaremos material visual e sonoro: versións musicadas en distintos estilos de poemas de Rosalía, fotografías de lugares de Vigo relacionados directamente co Rexurdimento e, se fose oportuno, daremos posibilidade de recitar algúns fragmentos dos poemas por parte do alumnado e profesorado.
Duración:
1 hora
Dirixido a:
alumnado de ESO, BACH, FP
Lugar de realización da actividade:
no propio centro de ensino (é necesario un ordenador, un proxector e un panel onde proxectar)
Para solicitar a actividade é necesario enviar cuberta, a solicitude que se achega, o día 29 de abril.
As solicitudes atenderanse por estrita orde de chegada o día 29 de abril a partir das 9:00 h e ata as 14:00 h

Solicitude de participación na actividade:
Charla: Vigo, capital do rexurdimento
para ESO-BAC-FP
Cubrirase unha ficha por cada un dos grupos que desexen participar na actividade.
Débese remitir a solicitude ao fax 986 22 06 78 o día 29 de abril a partir das 9:00 h e ata as 14:00 h
Importante: non se aceptarán as solicitudes que non estean correctamente cubertas (é obrigatorio cubrir todos os campos).

DATOS DO CENTRO DE ENSINO:
Nome do centro: _________________________________________________________
Nome e apelidos da persoa de contacto: ______________________________________
Teléfono: ____________________________ Fax: ______________________________
Número máximo de participantes nun grupo: 50
Hai que indicar a preferencia (de 1 a 16) para a participación na actividade:
______ 6 maio (luns), ás 9:30 h ______ 10 maio (venres), ás 9:30 h
______ 6 maio (luns), ás 12:30 h ______ 10 maio (venres), ás 12:30 h
______ 7 maio (martes), ás 9:30 h ______ 20 maio (luns), ás 9:30 h
______ 7 maio (martes), ás 12:30 h ______ 20 maio (luns), ás 12:30 h
______ 8 maio (mércores), ás 9:30 h ______ 21 maio (martes), ás 9:30 h
______ 8 maio (mércores), ás 12:30 h ______ 21 maio (martes), ás 12:30 h
______ 9 maio (xoves), ás 9:30 h ______ 22 maio (mércores), ás 9:30 h
______ 9 maio (xoves), ás 12:30 h ______ 22 maio (mércores), ás 12:30 h
Importante: a Concellería de Normalización Lingüística confirmará -por fax- a cada centro o/s grupo/s admitido/s, con indicación do día e a hora adxudicado/s.
Nome e apelidos da persoa que envía o fax: ___________________________________

OLA RÍOS, OLA FONTES!

A Concellería de NL, a través do Servizo de Normalización Lingüística do Concello de Vigo, oferta unha actividade dinamizadora do galego dirixida á poboación escolar.
-
Ola ríos, ola fontes!

Ola ríos, ola fonte!
é unha achega a Rosalía de Castro dende a recreación dunha terra, a nosa, chea de poesía, maxia e música que pousa no corazón dos/as nenos/as imaxes onde a natureza e os animais teñen un lugar importante. Miguel Ángel Alonso e Jesús Andrés a través de textos propios e de Rosalía debuxan unha Galicia viva e chea de esperanza.
Duración:
40 minutos
Dirixido a:
alumnado de infantil (de 4 a 6 anos)
Lugar de realización da actividade:
no propio centro de ensino (precisase dun proxector ou pizarra dixital e de altofalantes)
Para solicitar a actividade é necesario enviar cuberta, a solicitude que se achega, o día 23 de abril.
As solicitudes atenderanse por estrita orde de chegada o día 23 de abril a partir das 9:00 h e ata as 14:00 h

Solicitude de participación na actividade:
Ola ríos, ola fontes!
para infantil (de 4 a 6 anos)
Cubrirase unha ficha por cada un dos grupos que desexen participar na actividade.
Débese remitir a solicitude ao fax 986 22 06 78 o día 23 de abril a partir das 9:00 h e ata as 14:00 h
Importante: non se aceptarán as solicitudes que non estean correctamente cubertas (é obrigatorio cubrir todos os campos).
DATOS DO CENTRO DE ENSINO:
Nome do centro: _________________________________________________________
Nome e apelidos da persoa de contacto: ______________________________________
Teléfono: ____________________________ Fax: ______________________________
Número máximo de participantes nun grupo: 25
Hai que indicar a preferencia (de 1 a 10) para a participación na actividade:
______ 2 maio (xoves), ás 9:30 h ______ 7 maio (martes), ás 9:30 h
______ 2 maio (xoves), ás 12:30 h ______ 7 maio (martes), ás 12:30 h
______ 3 maio (venres), ás 9:30 h ______ 8 maio (mércores), ás 9:30 h
______ 3 maio (venres), ás 12:30 h ______ 8 maio (mércores), ás 12:30 h
______ 6 maio (luns), ás 9:30 h
______ 6 maio (luns), ás 12:30 h
Importante: a Concellería de Normalización Lingüística confirmará -por fax- a cada centro o/s grupo/s admitido/s, con indicación do día e a hora adxudicado/s.
Nome e apelidos da persoa que envía o fax: ___________________________________

FITO FALADOIRO

Anunciámosvos que xa leva uns días en funcionamento a web do proxecto Fitofaladoiro, centrado na recompilación de nomes e usos populares de plantas de Galicia:


A D.X. de Política Lingüística contribúe a publicitar a idea axudando á elaboración do díptico adxunto https://www.dropbox.com/sh/8pw957p9nl3l9b9/GJLd3w2R11/Fitofaladoiro_pantalla.pdf

Solicitamos a colaboración dos docentes para ir experimentando coa idea, entrando na web e suxeríndonos cousas a engadir ou mellorar se fose preciso.
Como pretendiamos, coa chegada da primavera a web xa ten uns contidos básicos (titoriais, documentos de apoio, e imaxes dalgunhas poucas plantas) para orientar a posibles interesados nalgunha das diversas posibilidades de participación.

Coas dúbidas que plantexen os docentes iremos mellorando os contidos da web. 
Esperamos que vos interese manter o contacto, mandámosvos un saúdo e moitas grazas por adiantado por difundir o proxecto.


FITOFALADOIRO
Recompilación de nomes e usos populares de plantas silvestres de Galicia
twitter: @fitofaladoiro

Organizan:
- Instituto da Lingua Galega (Universidade de Santiago de Compostela)
- Herbario SANT (Universidade de Santiago de Compostela)