Prezados/as amigos/as,
Tal e como vos estivemos informando nas pasadas semanas, a Coordinadora
Galega de ENDL coorganiza xunto con Nova Escola Galega as VI XORNADAS DE
MATERIAIS DIDÁCTICOS: Recursos e materiais didácticos para o ensino en galego,
que se van celebrar os días 29 e 30 novembro en Santiago de Compostela.
Ademais de ser unha actividade que ten a homologación da Consellería por un
total de 12h para os asistentes, queremos resaltar que a sesión do sábado pola
tarde responde ao espírito dos que foron os nosos Encontros de docentes pola
normalización que celebramos os tres cursos pasados e que este ano xa non
faremos de xeito independente, xa que realizan dentro do marco destas Xornadas.
Dende a CGENDL consideramos que, no momento no que estamos, este é un
encontro importante para difundir e coñecer experiencias e materiais didácticos
innovadores, así como para a creación autónoma de recursos e materiais
educativos en galego para todos os niveis educativos. Aínda que sigamos a
partillar materiais na nosa web, é fundamental tamén coñecer como se elaboraron
e que resultado deron moitos dos recursos. De aí que sexa imprescindible que
acudades, cando menos o sábado á tarde, ben a mostrar os vosos materiais e/ou
recursos educativos feitos en galego ou para a promoción deste idioma, ben a
ver os que hai e a tomar contacto cos seus autores/as.
As persoas interesadas en recibir a homologación de relatores deben
matricularse no curso a través da páxina da Nova
Escola Galega (acceso á inscrición). No caso
dos/as docentes aos que non lles interese o título só teñen que inscribir a
experiencia, pero non pagar a matrícula. Terán un xustificante de participación
pero non homologado pola Consellería.
Na vindeira fin de semana poñerémonos de novo en contacto convosco para
enviarvos a listaxe das experiencias que se van presentar.
Aproveitamos tamén para recordarvos que entre todos e todas podemos
contribuír a dotar de material o apartado de
recursos que hai na nosa páxina web e que é de acceso público.
Nese espazo, ademais de poder consultar un amplo abano de propostas para
desenvolverdes co voso alumnado, podedes achegar a través deste formulario
aqueles materiais que consideredes que poden ser de utilidade para traballar
tanto nas diferentes áreas do currículo como nas diferentes actividades que
levan a cabo os Equipos de Normalización e Dinamización Lingüística. Se tedes
calquera dúbida ou problema á hora de cumprimentar o formulario e enviar os
recursos, escribide a correo@coordinadoraendl.org.
A normalización do noso idioma e a formación do noso alumnado son tarefas
colectivas nas que cada un/unha de nós pode contribuír modestamente.
Saúdos normalizadores
CGENDL
Ningún comentario:
Publicar un comentario