IV DÍA DA CIENCIA EN GALEGO

Prezados/as compañeiros/as, 

Con motivo da celebración do IV Día da Ciencia en Galego o vindeiro martes 12 de novembro, a Coordinadora Galega de ENDL convida a todos os centros educativos non universitarios a participar en dúas videoconferencias vía web, na que destacados investigadores galegos da Universidade de Santiago de Compostela achegarán temáticas de interese curricular para o noso alumnado e os proxectos científicos que desenvolven na actualidade. Ademais de seguir a videoconferencia, os centros escolares que desexen participar terán a posibilidade de interaccionar con eles vía chat a través dunha sala virtual de fácil manexo. 

Videoconferencia para Primaria

• Relator: Marilar Aleixandre. Doutora en Bioloxía. Catedrática de Ciencias Naturais de Ensino Medio. Catedrática de Didáctica das Ciencias na USC. Autora dunha extensa e premiada obra narrativa e poética. Páxina web: http://www.marilar.org/
• Título: Benqueridos insectos.
• Sinopse: Benquerida abelliña, sen ti as maceiras non darían froito; benqueridos escaravellos, que volvedes á terra os restos do que foron seres vivos; e a cascarrubia que coida das roseiras, e a colonia das cen mil formigas falando cunha soa voz. Ás veces comémosvos, pois tamén comemos o que amamos.
• Destinatarios/as: alumnado de 3º ciclo (5º e 6º) de Primaria.
• Data e hora: martes 12 de novembro entre as 10:30 e as 11:30. 

Videoconferencia para Secundaria

• Relator: Jorge Mira Pérez (Doutor en Física e Catedrático da Área de Electromagnetismo do Departamento de Física Aplicada da USC. Director do Programa ConCiencia.
• Título: Como medir tamaños e distancias da Terra, a Lúa e o Sol.
• Sinopse: Poucas etapas da historia amosaron un talento tan brillante como a da Grecia clásica. Contaremos como fixeron eses gregos para sabe-lo tamaño do mundo que habitamos e calcula-la distancia á lúa e o sol e os seus tamaños, usando tan só o bo hábito de observar con coidado o que nos rodea.
• Destinatarios/as: alumnado de 3º e 4º da ESO e 1º e 2º de Bacharelato.
• Data e hora: martes 12 de novembro entre as 12:30 e as 13:30.

As videoconferencias terán lugar o martes 12 de novembro entre as 10:30h e as 13:30h a través dunha sala virtual de fácil manexo.
Necesidades técnicas dos centros:

• ordenador con conexión a internet (recomendado con cabo, non con wifi) e altofalantes,
• canón proxector e pantalla, e
• software: Flash media player.

Por motivos organizativos, os centros interesados (ata un máximo de 100) debedes enviar un correo a correo@coordinadoraendl.org indicando os seguintes datos: 

• Nome do centro,
• Departamentos/docentes implicados,
• Niveis educativos en que se vai desenvolver a actividade,
• Nº de alumnos/as implicados/as,
• Profesor/a de contacto (tamén correo), e
• Observacións (dúbidas, suxestións, etc.).

A continuación, recibiredes un correo no que se vos informará do enderezo URL da Sala Virtual e se vos dará as instrucións pertinentes.
Dende a CGENDL animámosvos a participar no Día da Ciencia en Galego (http://coordinadoraendl.org/cienciaengalego/2013/videoconferencias.php) e a partillar recursos e materiais en galego relacionados coa temática de ambas charlas a través desta páxina.
Saúdos normalizadores
Consello Directivo

CGENDL