MENSAXE DE BENVIDA DA CGENDL E DA CDEDLG DE VIGO

Prezados/as amigos/as,

Dende a CGENDL retomamos a comunicación con vós para, en primeiro lugar, darvos azos para este novo curso. Tamén queremos animarvos a, un ano máis, darlle continuidade ao traballo normalizador que estamos a desenvolver entre todos/as, e -ao mesmo tempo- partillar recursos, actividades e experiencias que redunden nese labor.  E non debemos esquecer facerlle chegar á administración as demandas dos Equipos e de todos/as os/as docentes que apostamos pola normalización do galego no ensino.

Neste primeiro correo, aproveitamos para para informarvos de novos materiais e dunha nova cita formativa de interese:

• Calendarios e materiais de planificación do curso: na nosa páxina podedes descargar o calendario escolar 2015-2016 (para os distintos niveis e en varios formatos e temporalizacións): http://www.coordinadoraendl.org/limiar.php?pax=rec_calendario.php. Igualmente, hai modelos de axendas escolares na zona de "Recursos", ferramenta colaborativa na que vos convidamos a colaborar con aqueles materiais, propostas e actividades que poden ser de utilidade para o resto da comunidade educativa: http://coordinadoraendl.org/limiar.php?pax=rec_rec.php.

• Por outra banda, o Centro de Documentación Sociolingüística de Galicia organiza os XVII Encontros para a Normalización Lingüística os vindeiros 15 (de tarde) e 16 de outubro (todo o día) en Santiago de Compostela. O profesorado que forma parte da CGENDL ten preferencia na inscrición. En breve, enviaremos información detallada e atoparedes na páxina do Consello da Cultura Galega o programa e o formulario de inscrición: http://consellodacultura.gal/.

• Renovación das adscricións. Pedímosvos que nos informedes dos cambios que se producen á fronte dos Equipos e que lles indiquedes ás novas persoas coordinadoras que se poden adscribir á CGENDL en http://coordinadoraendl.org/limiar.php?pax=rexistro_rex.php.

Saúdos normalizadores
Coordinadora Galega de ENDL